社會真係好撕裂，乜嘢都有得拗，好似立法會兩大陣營，即係建制派同民主派咁，但今次唔係兩大陣營鬧交，而係兩大陣營個名捱鬧。是咁的，做過臨立會議員、外號「王小二」嘅王紹爾，原來去信無綫電視同有線電視，投訴兩間電視台用「建制派」、「民主派」呢個標籤。

封信除咗畀兩大電視台，亦畀埋所有立法會議員，信中提及，「民主派」呢個名有「不恰當及誤導之嫌」，因為「民主」嘅定義好闊好廣好多元化，而且世界各國都冇「民主派」呢個分類，仲有，就算建制派對「建制派」呢個名受落，都唔可以將「民主」拱手相讓，所以將來應該叫「建制派」同「非建制派」。

其實王小二部份意見都啱嘅，唔少國家都冇「民主派」，因為人哋有民主；建制派都唔應該叫「建制派」，因為叫「保皇黨」似乎更加貼切。