高鐵果然能夠促進經濟，未通過撥款興建，已經帶旺個市，上禮拜反高鐵停撥款大聯盟快樂抗爭，撐高鐵陣營有樣學樣，噚日大搞快樂保皇嘉年華，旅遊界議員謝超人十分揼本，搵人舞龍撐高鐵，又搵低胸艷女跳舞為建制派議員打氣，難怪官員胸有成竹啦。
謝超人瞓身撐高鐵，佢位紅顏知己白姐姐竟然冇同男友同一陣線，一個人現身反高鐵陣營，唔通佢企錯邊？抑或做「無間道」刺探敵情？白姐姐見八方一臉疑惑，自己揭盅，「我同阿Paul唔同意見，好出奇咩？」

有餐廳送魚蛋粉支持

八方素來知道白姐姐敢作敢為，佢同謝超人唱反調確係唔出奇，白姐姐話支持興建高鐵，因為可以促進經濟發展，反對錦上路方案，因為總站設在新界冇人搭，「唔起好過，盞嘥錢。」既然唔反對建高鐵，何解又會站在反高鐵陣營呢？
白姐姐話一筆還一筆，佢支持香港言論自由，覺得身為香港人，唔可以揞住良心，「呢班反高鐵嘅後生仔都好乖，好勇敢，所以我好支持佢哋。」高官、土共指摘80後激進，估唔到白姐姐咁同情80後，佢又話今次咁多人反高鐵，顯然係因為政府諮詢工作做得差，唔識同市民溝通，講嘢冇人聽，亦解釋唔到市民疑惑，令大家都唔相信高鐵工程對香港有好處，總之就係自己攞嚟衰。
講到溝通，白姐姐當然勁過高官好多，連世間最複雜、講唔明、搞不清，剪不斷理還亂嘅兒女私情佢都搞得掂，何況高鐵？鄭汝樺局長真係要請教白姐姐如何同市民盡訴心中情，或者請佢做副局長，日後凡有收地、拆屋抗爭，就派白姐姐去談判，點計都好過搵啲隱形人尸位素餐。
站在反高鐵示威者一邊嘅仲有好多人，沙田有間餐廳噚日下晝送咗100碗魚蛋粉去中環，畀反高鐵人士醫肚；駐重兵喺中環嘅警方，則在滙豐總行附近設立茶水站，提供熱飲同餅乾，由於只得乾糧，好多警員寧願幫襯茶餐廳。

mailto:[email protected]