Celine爸爸譚順生是非多多，而佢「Dr.Steve」嘅名銜同聲樂無關亦令網民非議，最後佢嘅個人網頁、fb仲摺埋咗，而佢學校嘅網頁就改咗叫番「Steve Tam」。(新聞連結： http://bit.ly/2tIkOjH )今日譚順生出席記招時，除咗解釋佢嘅博士學歷係為咗佢開嘅獵頭公司而讀，仲好辛苦經過兩年嘅學習先至畢業。而「Dr.Steve」就係咁沿用到o依家。

咁又點解突然開歌唱學校呢，原來係因為Celine，譚順生話：「喺2007年Celine出世之後呢，我發現Celine鍾意唱歌，我本身就教唱歌，喺當時我就決定栽培佢唱歌喇！由於我越栽培佢我覺得佢越開心，我自己又開心又好滿足，我跟住同太太商量，想開間歌唱學校啦！我想幫多啲細路仔，咁我show一啲資料去宣傳學校，而呢個資料係可以攞到，學校資料入面所有內容、所有字眼入面，都係冇講過我自己係有音樂專業資格，係冇（寫）嘅！我好深信每一位學生嚟跟我學唱歌，都係因為欣賞我教我囡囡Celine嘅方法而嚟嘅！如果有任何人、任何我嘅學生因為「Dr.Steve」個名令佢產生誤會，誤以為我有音樂專業資格呢，我只可以話深感抱歉。」

最後，譚順生就話佢好多謝大家關心佢同Celine，仲話：「我覺得每個人都有過去，我有我經歷，我有好多不足之處。作為父親，小朋友畀我好多好好嘅學習機會，讓我不斷去提升自己去做好自己，嚟緊我會好決心地同我所有能力做一個好父親，好多謝香港各界、中國同胞、所有人好厚愛Celine，多謝！」講完再深深鞠躬。