前日沙田馬場莎莎婦女銀袋日，唐唐媽咪唐尤淑圻第四場拉頭馬出晒風頭，到第五場就唔再係女人威晒，今次由金管局前總裁任志剛拉頭馬。
佢勝出匹愛駒係自購馬「飛燕」，呢隻其實係團體馬，有份嘅成員都幾巴閉，除咗白頭任，仲有馬會大董李國棟醫生、榮智健千金榮明方、前首席大法官李國能。唔知係咪因為成班成員全部係猛人，獨贏熱到得1.5倍，結果無驚無險大熱勝出，幫唔少馬迷贏錢。
不過，喺凱旋門只見任志剛同榮智健太太拉頭馬，自從中信泰富（267）單嘢後，榮太已好少公開露面，噚日銀袋日入場，都算畀面。

曾養過多匹名駒

對賽馬素有研究嘅任志剛，曾經養過唔少名駒，除咗周日首次出賽即帶挈攞彩嘅團體馬「飛燕」，唔能夠唔提89年佢養嘅首匹名駒「自己友」（Insider），有份奠定聯滙制度嘅金融沙皇，當年仲曾經打算將匹馬起名叫做「聯滙」（TheLink），後嚟先易名叫「自己友」。
帶領過香港度過兩次世紀金融風暴嘅任總，出名多招，係繼前聯儲局局長格老之後，全球最長任期嘅央行行長，佢養嘅馬，名字亦多籮籮，可以話趁晒佢性格，分別有「怪招」、「有計」、「有錢賺」同埋「威將名駒」等等。
近日下屆特首「跑馬仔」，傳聞同好友唐唐密會嘅任總，據聞因任總啱啱外訪回港，「雙雄會」仲未夾啱時間舉行，但以佢兩個幾廿年交情，一個電話就乜嘢密偈都傾到啦！
李華華
mailto:[email protected]