鐵扇公主下凡收服牛魔王？當紅女將蔣嘉琦這晚又放又追，眨吓眼跑完前三場，已經起孖揚威快活谷。
嘉琦BB先於第二場騎苗廐「旅遊多寶」一放到底，爆出10倍冷Win，到第三場五班1200米，則為告廐「牛魔王」以次熱身份守好位下取勝，兩駒都係初次贏馬，嘉琦自製一口處女馬孖寶。當中「牛魔王」單Win及組合獨贏A2，分別派45及21.5元，此匹蠻牛在港跑到第17戰，但讓馬主首嘗拉頭馬滋味，賽後告達理一樣笑到見牙唔見眼。
「牛魔王」賽前只得19分，如今贏馬加分後，將會重返21分或以上安全線，脫離淘汰危機，下季可以繼續服役，而蔣嘉琦在港已贏18場頭馬，只要贏多兩場，就會升格轉為受讓七磅。
今場低班賽係熱門天下，有飛馬「大將風速」在蘇狄雄胯下後上第二，莫雷拉騎大熱門「神光輝耀」前置得第三，第四名由第三熱門「金磚五國」夥拍潘頓拎到，四重彩派5,456元。
告達理憑「牛魔王」贏出馬房季內第14Win，其馬房今季累積獎金已經超過千五萬，馬會規定如練馬師於季內未能取得15場頭馬，但取得13或14場頭馬，而所得獎金總額不少於1,500萬，將視為達標，因此告達理其實已畢業上岸。
告達理指「牛魔王」田泰安上仗已騎得很好，但他急於交代，故此用嘉琦減十磅出擊，很開心此駒今仗可以勝出，下季可以繼續保留。