謝霆鋒今日到會展出席創科博覽2017嘅講座「鋒味人生」，霆鋒打扮成Steve Jobs咁，牛仔褲、T恤加西裝外套，戴上Ear mic出場。前特首董建華、楊受成同容祖兒都有到場，整個講座約個多小時完成。

霆鋒將自己嘅工作分成三部份，分別係音樂、影視同美食。對於影視，佢話以前拍電影用菲林機，之後轉咗做數碼機，但霆鋒覺得香港做得未夠好，22歲時因為唔忿氣，將儲咗嘅西環一層樓嘅首期，再加一層樓按俾銀行嘅錢，開咗自己第一間公司，負責影像上嘅後期製作。終於一做就十幾年，得到外國一間好大嘅後期公司「數字王國」合作，為咗引入一啲最好嘅後期技術，於是乎佢都接受咗。

講起呢啲創新科技，霆鋒話香港同大陸都係炒股炒樓，冇乜創新科技，日常生活物品都要靠日本、韓國或者歐洲進口，佢喺台上反問：「點解我哋創立唔到一個屬於自己嘅品牌？點解我哋冇？點解呢？」

為咗解決呢個問題，霆鋒喺台上話會同各大唔同基金合作，成立「鋒助人生」基金幫人實現夢想，雖然冇透露基金用咗幾多錢，但霆鋒話：「收到你哋嘅idea，我會幫你哋宣傳，等全國嘅人認識。」

講講下霆鋒仲走落台搵董建華，話好想請教對方，而董建華話：「霆鋒講得太好，聽到有啲激動。」佢仲讚霆鋒係香港年青人榜樣，應該好好向霆鋒學習，無啦啦佢仲講埋特首林鄭月娥，叫人支持下林鄭。