甄詠珊下晝同埋程芷渝(Milla)、仙樂都，仲有組合BGs，喺尖沙咀拍一部懷舊微電影。話係以8、90年代做背景，個個著晒BlingBling珠片裝是常識吧，其中程芷渝仲穿黑絲露晒長腿添。

離開亞視已經年幾嘅甄詠珊話，今次完全係仗義幫老友Milla，佢話上個月同Milla一齊搭車，點知就發生交通意外，之後大家都唔開心，所以約埋一齊去旅行，返嚟香港之後就friend過打band喎。

加上呢部叫《我歌我唱》嘅微電影，係講Milla自己嘅故事，所以自己乜都唔理，就到場幫手喇。甄詠珊扮演歌女，話拍呢部片冇劇本，完全係考天才，雖然老友話會出返人工比佢，不過自己就義氣行先，冇所謂咁話。

放咗年幾假嘅甄詠珊仲話，將會開始投入工作，佢話：「出個人大碟係我嘅夢想，雖然我唔係好唱得，不過仲好鍾意寫詞，其實歌我已經寫好晒。最近就寫咗首情歌，係同馬航事件有關，我想講世人好善忘，但係希望佢哋聽完首歌會諗起，要珍惜眼前人，等我病好返晒之後，就會開始錄喇。」