特區政府噚日喺正式開幕冇耐嘅海洋公園萬豪酒店大搞《粵港澳大灣區發展規劃綱要》宣講會。叫得「宣講會」，在場嘉賓果然個個都只係單向「宣講」，連答問環節都唔見有，不過啲表忠擦鞋活動就算幾無聊，一班達官貴人一定要到，所以特區政府高層、中聯辦官員、以及唔少建制派要員都現身撐場，但八方睇嚟睇去，發現唔見咗成日係facebook唱好大灣區嘅前特首梁振英，照計冇理由佢會唔現身？

話說689喺娥特宣佈成立大灣區辦公室後，快快手自行成立「大灣區香港中心有限公司」，又不斷發文刷存在感，但八方見噚日著名「梁粉」張志剛、劉炳章等宣講會未完已提早離開，但等到最後都唔見689。

合組共享基金會

有政界好事之徒仲講笑，宣講會有咁多人到，作為政協副主席嘅689就算在海外都一定返香港，怕人唔記得佢都關大灣區事！究竟689噚日因乜唔蒲頭八方唔知，但佢好明顯好想人知大灣區關佢事，即日喺fb撰文話《粵港澳大灣區發展規劃綱要》喺23方面支持香港。

689喺宣講會消失，另一個可能佢有其他大茶飯忙住搞。噚晚網媒「香港01」報道，原來689同20名大孖沙、央企高層合組個「共享基金會」，成員有恒基地產副主席李家傑，華人置業主席劉鳴煒、東亞銀行執董兼副行政總裁李民斌、中交建副總裁文崗、國藥國際董事長石晟怡等等，至於呢個基金會搞乜呢，報道入面引述基金會公司章程，旨在推行非牟利國際人道項目。呢壇嘢有咁多富豪參加，肯定水頭充足，689隨時又可以用呢個基金搞好多嘢。

李八方