聖誕、新年雖然不停有馬跑，但唔少練馬師照請假外遊，好似葉楚航，之前就同家人去日本玩咗幾日。佢話今次行程早於「山竹」襲港前已經計劃好，因此儘管因颱風關係於聖誕期間補賽，一於放假照去可也。最緊要安排好馬房工作，唔好影響到馬匹成績。

葉楚航雖然不在港督師，但近日依然憑「放馬過來」及「錢途再現」交出頭馬，真係要畀個Like佢！

航哥有聘用健身教練為自己操弗，但去到日本難以抗拒魚生同燒牛肉嘅誘惑，最終當然重咗幾磅返來香港，難怪他笑言呢排又要再次接受爆汗地獄式訓練。

回說周日（6日）賽事，第二場五班1400米草地之灰馬仔「盛勢」，有望為葉廐增添頭馬。呢匹灰馬上季尾於潘頓胯下輕勝，今季回升四班即打回原形，輸咗幾場跑返五班贏馬路程1400米，據知曾有幾位騎師向葉楚航索騎，但練者認為潘頓騎得最好，自然留返佢操刀，論實力於五班肯定超卓，抽埋一檔更值得睇好。