無綫《殘酷一叮》噚日移師澳門舉行試叮大會，出席者有主持梁榮忠同鐘禧文，嘉賓方面就有徐子珊、鄧麗欣（Stephy）同戴夢夢，約一百五十人參加試叮。
一個打扮成「華英雄」嘅男參賽者獻唱《小李飛刀》，佢唱唔夠一半就俾忠仔叮走，但係華英雄好唔順氣，竟然係台「妖」咗一聲，又問：「邊個叮我？」忠仔即刻好嚴肅咁話：「係我叮你嘅！我接受你哋唔順氣，但我唔接受講粗口，你最好返去學吓修養先！」搞到華英雄好冇癮咁落台。
而另一對男子組合「番薯二人組」就夠晒出位，兩個人都電咗個爆炸頭、着住紗裙襯對魚網絲襪，唱得興起，竟然連裙都除埋，不過條裙底下重有短褲打底，但最難頂係短褲外又笠住條女人底褲，心口就貼住星星同戴上胸圍，差啲笑死Stephy。

祖名撐《一舉成名》

此外，亞視噚日錄影《一舉成名》，參賽者陳俊瑋扮房祖名，又學成龍高舉V字手勢，主持肥仔聰問佢點解，佢話：「IloveHongKong」，肥仔聰就幫佢解畫話：「係兩個老婆同兩個仔女！」最後勝出嘅係扮周華健嘅周華安，獲得五千一百零四蚊。