當年今日

701收料站:航通貨落強者手

蘋果日報 2003/09/15 08:00


小初上周一提過,有經紀波友叫留意航天科技通信(1185),傳聞隻股可能配股。點知話口無耐,航通已於中秋節當日搞批股,雖然集資金額唔大,只得1140萬元咁大把,但波友話貨源係落入強者之手。
航通上周四以每股0.30元,配售4000萬股新股,集資淨額1140萬元,主要用作一般營運資金。
講真嗰句,1140萬元貨其實好濕碎,如果小初手頭鬆啲,夾埋兩三個老友都食得晒,實在唔明佢哋所謂嘅強者之手,究竟有幾強勁?
不過波友話,單睇上星期星洲出現沙士事件,大部份股仔急急回落,但航通股價則未見大散,兼夾有大戶肯科水要貨,呢一點已經值得留意,如果股價炒得上,要搞多次批股又有何難?
今次航通配股價,雖然比上周四收市價0.39元,大折讓23.1%,但由於今次批嘅係新股,承配人嘅股票唔會咁快到手,所以少一重即刻沽出街嘅憂慮,反而股價有機會慢慢砌上。
慕容小初