阮經天憑台灣偶像劇《命中注定我愛你》走紅，之後發展得好順利，近年仲喺大陸密密拍戲搵埋唔少人仔，雖然同許瑋甯分手情場失意，但事業得意，最近仲細屋換大屋，購入約2250萬港元豪宅。但小天置業唔係自己住，而係畀屋企人住，認真孝順仔，同時亦可以做車庫用嚟擺車。小天經理人小八回覆台灣傳媒話：「那是小天買給家人住的房子，他並不住在那裡，請不要去打擾他的家人。」

噚日台灣有讀者爆料，形容小天新居：「離他三民路舊家約500公尺，房仲報價8600萬(台幣)，他的BMW M3和3台重機都停裡面，最近在裝潢，他還沒有搬進去。」台灣傳媒又報道，小天新居係一個1樓雙連單位，有兩個車庫，一個露天位就泊住小天嘅愛車同一部電單車，另一邊就搭建咗個車房，方便愛玩車嘅小天改裝車。

從外邊圍欄望入去，見到單位大致裝修好，不過傢俬唔多，暫時只係擺咗幾張枱，注重私隱嘅小天喺門口兩邊裝咗CCTV，果然記者喺門口外邊望咗無幾耐，就有警察到場查問。而之後車庫嘅捲閘打開，着街坊裝嘅小天揸住白色Honda MSX電單車出門，臨走前仲笑晒咁同屋企人say bye，而小天細佬同親友就繼續留守新居執屋。

精選娛聞，喺晒《娛果》
http://fb.com/appledailyent