高官輪流落區推銷政改方案，噚日輪到政制及內地事務局副局長黃靜文出場。男拔萃公民教育委員會邀請林D9，局方卻派黃靜文上陣。
黃靜文噚日低調到校，官府事後先發出新聞稿。「維園阿哥」馬草泥係男拔舊生，如果佢早知黃靜文現身母校，唔踩場至奇。

噚日有大約200個學生出席交流會，校長張灼祥稱問題都係圍繞普選，不過冇上星期庇理羅士女子中學老師吳美蘭質問唐英年般戲劇性場面，「大家都唔多熟佢（黃靜文），唔會太苛刻。」民主黨區議員兼該校老師程張迎同八方講，他向黃靜文提出應該取消功能組別同民主黨個區議會方案等問題，黃靜文官方口徑回答，冇驚喜。
程Sir稱黃靜文表示2017、2020特首、立法會有普選，學生反問有甚麼提名門檻同功能組別係咪繼續存在，黃靜文冇明確交代，「我哋覺得唔收貨。」程Sir又話可惜當局唔安排傳媒在場，「呢啲公民教育活動，應該畀多啲人睇。」