加里夫巴利帶領威爾斯嘅歐洲國家盃出戰英倫打吡，雖然加時畀英格蘭絕殺，但上半場入咗球超靚罰球，叫做攞返個安慰獎。英國傳媒就以科學角度解構巴利呢球罰球，話俾球迷知點解赫特撲到盡都救唔到呢個靚波。

巴利呢球35碼嘅罰球，平均時速高達時速56.2英里（大約時速90.45公里），即係話個波由巴利腳下飛到龍門面前只需要1.2秒，真係眨吓眼都已經入咗。巴利仲喺助跑時挺直上半身，等佢嘅腰力可以貫注落左腳，射出呢個勁度十足嘅波，亦都證明咗腰力對一個男人相當重要。呢腳波曲墜之餘，仲要向右轉咗大約六度，真係連打機都無咁靚，難怪赫特撲到都入。

不過球場向來都係勝者為王嘅英雄地，最後威爾斯都係輸咗俾英格蘭。巴利如果唔想咁快放暑假，睇怕下場俄羅斯要繼續入波先得喇！