港股連跌5日，雖然上周反彈百點，但恒指由高位20809點，跌到19442點，已經唔見咗1367點，網民討論區遍地哀鴻，大家一齊分擔蝕咗錢嘅哀愁。ykcalvin2004喺《香港討論區》話自己蝕成100萬。etk92就話自己嘅身家，喺周二及周三兩日內蒸發咗十幾萬，雖然唔見咗錢，但就發覺自己EQ高咗，只係危機感同IQ低咗！
吉村春代就喺網上搵人打救，「我全副身家剩番5000蚊，欠債5萬蚊；我唔想兩年都食麫包皮呀！有冇方法5000蚊變5萬蚊。」FokFokFok即刻教路，叫佢立即去銀行換錢，5000蚊可以換到7萬幾日圓，換南韓圜仲多，有成60萬幾。
正股跌，窩輪跌得仲甘，fffwin就因為炒輪勁輸，「呢個星期二我喺滙豐輪、建行輪都輸咗5萬幾，越想翻身就踩得越深，喺家無身家可言，仲負債7萬蚊。」
曾幾何時，唔少網友有工唔返，話要全職炒股，經過呢次股災，大家終於返回現實，betball話：「我用一萬變咗過百萬，不過係自己搞生意，唔努力邊賺到錢㗎！成日諗點樣不勞而獲，係咪有用呢？努力工作還錢最實際呀。」

等升番？睇電盈！

不過，仍然有網友相信「有賭未為輸」，sweetherb就叫各散戶，「一定唔好蝕賣，因為過一段時間，股價總是升凸。輸嘅唔係眼光，而係膽量同耐性；只要入到實力股，一定唔會輸，最多係收割時間等多一兩個月，所謂財不入急門！」
網友如果真係聽sweetherb講，就要小心，正如Doggyman所講，咁會蝕咗時間值同機會，或者你可以用同一筆錢，買到更抵更好嘅貨哩。3dpro更加提醒大家，「當年最大教訓就係電盈（008），你點長命都番唔到去！」