精明消費：
女性雜誌期期有着數韓國土炮送超勁贈品

蘋果日報 2005/04/29 00:00

香港係一個多元化的城市，市面上有不少非本土的雜誌。在眾多非本土雜誌中，以東瀛雜誌最受歡迎，皆因時裝化妝個Trend啱晒香港人口味。不過近來韓風凜冽，唔少人就算唔識韓文都照樣買嚟睇。其中有韓國時裝雜誌每期都有好勁嘅贈品送，以前曾經送過嘅就有矮身枱仔和波鞋，係唔係勁到你唔信呢？

記者：區佩嫦
攝影：陳陶鈞、林栢鈞
模特兒：Vicki
日韓雜誌各師各法
東瀛雜誌勝在選擇多，時裝化妝頂呱呱外，佢哋嘅手工藝亦都「衣之班」，正因為瓣瓣掂，不少雜誌走較專的路線，好似指甲花、花藝、收納等。而韓國雜誌就以贈品吸引取勝，可謂各師各法。
韓星搖籃
同樣成吋厚的《Ceci》月刊，介紹化妝、時裝潮流、明星動態等，而不少韓國明星也曾任《Ceci》的模特兒，好似電影《少年阿虎》的女主角金賢珠，便藉此雜誌入行。而今期就送Dymo機一部，雖然無指甲印花機咁勁，但都值幾十蚊，算抵買。
售價：$93（d）
empty
empty
化妝主題夠專業
日本人的扮靚技巧超高明，想吸收日本的化妝資訊，不妨選擇呢本《MAQUIA》月刊。全書主力介紹護膚、化妝等產品及心得，每期更Sell不同的主題，好似四月號就以美白為主題，以後買護膚品前可睇啱先買。
售價：$56（d）
empty
empty
韓國土炮潮流雜誌
《CindythePerky》屬韓國土炮時裝雜誌，主力介紹時裝潮流、化妝、減肥等資訊，本書有成吋厚。每期必送禮物，四月號就送指甲印花機，呢部機在香港的化妝品舖賣成九十幾蚊，𠵱家隨書附送，超筍！上網睇五月號係送婆仔鞋一對。
售價：$100（c）
empty
至強慳位收納法
想用最慳位的方法將寒衣入槓？不妨向日本雜誌偷師，這本名為《Interior》的家居雜誌，不定期推出。此書以個案形式介紹慳位的家居裝修和日本最擅長的慳位收納法，睇完必定有心得。
售價：$62.8（b）
empty
手藝書有得睇有得學
日本女性的手藝的確頂呱呱，而手藝雜誌亦有極多的選擇。呢本以布藝為主的《CottonTime》月刊是手藝雜誌中最受歡迎之一。全書示範了不同的布藝產品，製成品的手工極之細緻，最緊要係有埋紙樣，可以邊睇邊學。
售價：$92.2（b）
empty
成熟版《non-no》
屬於月刊的《Luci》，多以明星作為封面，內容以介紹服飾、化妝等女士至愛的日本Trend為主，內容與布局無《non-no》咁重少女味，啱晒一班哈日OL。
售價：$60（c）
empty
必睇八卦新聞
想多啲留意日本藝能界新聞的話，呢本《週刊女性》最啱，全部以日本娛樂新聞為主，是日本人每周必買的八卦周刊之一。店員話若那期有韓星裴勇俊的話，未到港已經有一串訂購List，都咪話唔誇。
售價：$48（d）
empty
韓國雜誌每期都有So
近年韓流超勁，原來韓國雜誌都有一定捧場客，這班捧場客唔一定為了韓國的潮流資訊，佢哋為嘅只係隨書附送的禮物，份禮物分分鐘重貴過本雜誌。「韓國雜誌可以話每期都送禮物，送乜真係唔定，護膚品、化妝品都好常見，試過送矮身枱仔（！）、波鞋（？）、靴！？……」雜誌店負責人王先生表示。
初初聽到都覺得幾驚，心諗：「點送呀？係咪講大話？」抱住懷疑的態度繼續到另一售賣韓國雜誌的書店，售貨員講出同一番說話，店員重話：「啲波鞋同本雜誌一齊Pack好，放嘅時候都幾嘥位。而好多客買韓國雜誌都係貪份禮物，見到抵就買，識唔識睇韓文係另一回事。」
歐美雜誌時裝資訊夠全面
歐美的時裝雜誌，除了有齊今季同來季的Trend外，不少還夾雜其他家居、購物、健康小資訊，讓你扮靚之餘也得到更全面的照顧。
美國至潮扮靚書
《allure》為美國時裝雜誌，以BeautyExpert自居，睇落有點似《Cosmopolitan》，同樣有齊化妝、髮型、扮靚小貼士等，是美國至潮的扮靚雜誌。
售價：$50（c）
empty
名人訪問名人
這本《O,TheOprahMagazine》是由美國TalkShow主持OprahWinfrey創辦，最大賣點當然是Oprah本人訪問的名人報道。另外還有時裝、飲食、生活貼士等。
售價：$69.8（d）
empty
專走年輕潮流
同樣為法國時裝雜誌，《Jalouse》走較Young路線，介紹的服飾較Casual，好似四月號則介紹牛仔褲，最啱老牛一族。此外，還有購物、化妝等資訊。
售價：$75（c）
empty
英國暢銷美食書
愛煮兩味的話，不妨選擇英國最暢銷美食雜誌《GoodFood》，全書教你不同的食譜，以五月號為例，有「以煎Pan走天涯」的簡單食譜、30分鐘快速食譜等。
售價：$65（c）
empty
備受傳媒推崇
想吸收歐洲的時裝資訊，法國雜誌是不錯的選擇。這本《Numero》月刊，備受時裝界及傳媒的推崇，資訊夠In夠新外，最重要係啲相夠靚。
售價：$110（c）
empty
荷李活經典
《People》以採訪明星、名人為主，而不少明星更將第一手的消息向《People》披露，絕對是荷李活迷不可錯過的雜誌。
售價：$35（c）
empty
兩岸雜誌趨多元化
台灣及大陸兩地的雜誌近年愈見愈多。由於不少台灣的時裝雜誌也得到日本方面的版權，無論印刷、排版及內容較國內的略勝一籌，而且選擇亦漸趨多元化，當中以扮靚及收身雜誌最受歡迎。至於國內雜誌，印刷、內容的質素均較差，幸好有一些專講韓劇的雜誌，滿足一班韓劇迷。
台版少女雜誌
台灣的少女雜誌《Popteen》帶點日本《non-no》的影子，每月一本，價錢卻較廉宜。時裝化妝等內容樣樣有齊，嫌日文書無親切感，呢本是不錯的選擇。
售價：$25（a）
empty
星座迷必讀
台灣的少女極信星座、占卜之說，故市面上擁有不少此類型的雜誌，屬月刊的《談星》便是當中佼佼者。每期也有以12星座為主題的內容，還有最啱學生睇的考試運占卜和姓名學魔法。
售價：$27（a）
empty
收身顧問
台灣的扮靚及KeepFit雜誌亦十分多，這本最為哈台族女士歡迎的《Body》，每期都有不同的減肥主題，飲食、運動，應有盡有。
售價：$20（f）
empty
國內時裝娘味濃
大陸本土的服裝雜誌質素較為參差，呢本土炮雜誌《Coco》以少女服飾流行雜誌為主，同樣有齊服裝、化妝等資訊，不過感覺太娘，香港人未必接受得到。
售價：$28（e）
empty
韓劇迷必睇
大陸雜誌中，最受推崇的相信是一系列關於韓劇的雜誌，好似呢本《韓劇風雲》，內裏有齊最新的韓劇資料，除主角介紹外，重有每集劇情。另外當然唔少得韓星訪問啦！
售價：$21（e）
empty
售賣點
(a)城邦書店 25086231 灣仔軒尼詩道235號

(b)旭屋書店 28318629 銅鑼灣軒尼詩道555號崇光百貨11樓SOGOCLUB

(c)捷刊有限公司 25233982 中環德輔道中19號環球商場233店

(d)PAGEONE 22715217 尖沙嘴海港城3002店

(e)尚書房 27708826 旺角西洋菜街48號1樓

(f)CircleK有售

備註：部份雜誌售價根據滙率有所浮動。