喺英超排第10嘅車路士，周一喺官網公佈，正式聘用干地為新帥，雙方簽約三年。新人事新作風，第一個被out嘅好可能係夏薩特！

據報車仔想將呢名25歲翼鋒掛牌出售，只要有球會畀得起5,000萬鎊（約5.5億港元）就得。邊隊會出手？最大機會梗係西甲班霸皇家馬德里啦。皆因報道又指車路士想要占士洛迪古斯（J-Rod）。

其實用J-Rod換夏神係雙贏嘅。自施丹成為皇馬主帥後，洛迪古斯就不受重用，轉換吓環境可能對呢位哥倫比亞國腳係好事。至於夏神早前都講過想去皇馬，家陣車仔有意成全，夏神唔知係咪偷笑緊呢？