韓國36歲女神全智賢2012年跟韓服設計師李英熙外孫、設計師李正宇兒子崔俊赫結婚，婚後全智賢積極造人，於前年為老公誕下慈姑掟，今年再誕次子，兩年抱兩。

而全智賢1月生B全職做媽媽湊仔，未有復工，只係間中拍下廣告還廣告債。而上月韓服設計師李英熙病逝，全智賢亦專心處理喪事。直到今日全智賢終於蒲頭，係產後首度公開露面，現身太陽眼鏡品牌活動，不過全女神今日嘅打扮就似乎失手，佢着上一身套裝，內裡以鬆身白T打底，唔知件衫太鬆關係定係女神未修身，見佢腰肢比佢弗爆時期明顯粗咗唔少。

另外，全智賢今日出席活動前，噚日喺百貨公司行街就畀網民捕獲到，只見女神着住鬆身T恤、戴住帽，專注地揀BB衫。

更多韓流，喺晒《娛果》
http://fb.com/appledailyent