我求大俠做人就最緊要有「宗旨」，但大家嘅「中指」其實都一樣唔可以唔活動，得閒就要搵啲機會show出嚟畀人睇下至得。早幾年前立法會議員黃宜宏就失驚無神伸中指「問候」示威群眾，認真無厘頭，但係AC米蘭教練安察洛堤早排向祖雲達斯球迷豎中指，可以話係「出師有名」啦！
AC米蘭、祖雲達斯同國際米蘭呢3支意甲風頭躉幾日前喺TIM盃對賽，大家都一直以為「串王」摩連奴帶國米，喺較為重要嘅賽事登場會成為大家焦點。點知一向以溫柔敦厚形象嘅安察洛堤就玩得仲絕，豎起佢肥大嘅中指雄糾糾咁指住班祖雲達斯球迷，憑一個簡單動作已經勝過千言萬語，搶晒「摩佬」嘅風頭！

祖記球迷逢人鬧

「肥安」呢次對祖記球迷真係老實唔客氣，喺AC米蘭對祖記賽後接受訪問嘅時候，佢仲理直氣壯咁認自己有「問候」班球迷。究竟「肥安」要反擊啲乜？原來係祖記嘅一班激進球迷喺場邊不斷作出挑釁，而最令「肥安」頂唔順個句就係「乜豬都識教波咩」，搞到平時斯斯文文嘅「肥安」佛都有火，唔出中指又點平息呢件事呀！
安堤洛堤仲話唔只佢自己俾人「問候」，倒戈上陣嘅森保達俾人叫做「叛徒」。為咗要為班球員同行家出氣，「肥安」以暴易暴咁對番啲祖記球迷，唔值得鼓勵，但都可以話係無可厚非。計我求大夾話，家和萬事興，一齊搞好意甲唔好鬼打鬼好過啦！