內地爆發非洲豬瘟，情況一旦蔓延，勢必影響本港活豬供應。大部份售賣豬肉食品的食肆負責人受訪稱，暫未受到內地非洲豬瘟影響，活豬供應仍穩定，惟一旦停止供應新鮮豬肉，無奈下需用冰鮮甚至雪藏豬肉代替。有豬骨煲老闆稱若冰鮮豬肉質素太參差，會考慮停售豬骨煲；老牌酒家鏞記原來5年前已轉用外國進口冰鮮豬肉，董事甘連宏解釋只要處理得宜，冰鮮豬肉質素不一定比新鮮豬肉差。

記者：劉卓瑩　周子惇

火鍋店新明記肥牛豬骨煲，每日需用逾30斤新鮮豬骨製作豬骨煲，每日一半以上的客人都會點豬骨湯底。老闆馬先生指生意暫時未有受到內地豬瘟影響，供應商未有加價或減少供應，不過他強調新鮮豬骨對熬湯十分重要，「新鮮豬骨一來冇雪味，肉味會重啲，咬落去肉質會好少少，有啲肉汁。通常冰鮮豬骨會雪咗一段時間，令到啲肉會比較霉身，或者雪味好重，熬出嚟嘅湯味道都會唔同。」

一旦新鮮豬骨供應量大減，甚至出現「沒有活豬的日子」，馬先生無奈指會考慮用外國進口冰鮮豬肉，「睇下煮出嚟嘅食物會唔會好大變化，如果真係差好遠嘅話，就可能會考慮停止賣有關豬嘅嘢。」不過即使有冰鮮豬肉適用，如來貨價超出餐廳可負擔的價錢，馬生認為有機會要加價應對。

粵菜餐廳留家廚房老闆劉晉，明言該店所有豬肉菜式均使用新鮮豬肉，雖然供應商暫時仍維持穩定活豬供應，惟「最壞情況（內地）停晒供應，本地豬場一定唔夠供應，到時活豬價格一定升。」不過劉未有如其他行家一樣為活豬囤貨，「香港地地方邊度夠，冇咁多雪櫃啦。」現時亦只能靜觀其變，如情況嚴重，才考慮需否用冰鮮或急凍肉取代，屆時會對湯品類菜式最大影響，因鮮味難以用急凍豬肉取締，「湯底用嘅豬骨、豬肉一定要用新鮮豬。」

內地豬場非洲豬瘟失控，劉晉認為，港府現時應加強截查非法攜帶豬肉入境，「最危險係呢啲人手過境，如果（非洲豬瘟）問題蔓延到香港，就失守，一定要保住（香港活豬供應）。」

不少食肆計劃一旦沒有活豬供應，惟有以冰鮮豬肉代替新鮮豬肉。而老牌酒家鏞記，原來早在5年前已轉用冰鮮豬肉，至今酒家所用到八成的豬肉菜式，均是從加拿大進口的冰鮮豬肉，故行政總裁甘蕎因稱不擔心豬肉供應問題，「尤其是燒味部裏面啲叉燒，同埋𠵱家我哋冬天用嘅臘味，大部份都係全部用晒入口豬。」

甘蕎因指過往即使從本地供應商取得品質較好的新鮮豬肉，仍會出現質素參差問題，且價錢浮動，故決定直接從加拿大農場訂購豬肉，更可指明特定部位，故豬肉質素和價錢均比以前穩定，「最緊要𠵱家大家都知道（豬肉）『traceable』，都知道個源頭喺邊度。我係直接同個農場去（入口），知道邊個農場用啲乜嘢豬。」現時酒家每月從加拿大入口6至8噸冰鮮豬肉，每批豬肉可儲藏30至50日。

坊間一般認為新鮮豬肉質素比冰鮮好，負責採購的鏞記董事甘連宏則解釋，如果冰鮮豬肉在運送過程恰當儲藏，例如經真空處理，而且烹調前有足夠時間解凍，質素不一定比新鮮豬肉差。

你敢爆，我敢獎！ 立即WhatsApp《蘋果》24小時爆相爆片熱線 或致電：63836568