草蜢喺舞台上跳跳紥超過30年，為Fans帶嚟無限正能量同快樂，近排佢哋為嚟緊11月初紅館演唱會再施快樂魔咒，錄主題曲《Live Goes On》，點知首歌感染咗身邊唔少朋友，仲整咗個好友合唱版。

日前草蜢喺北角接受訪問，負責寫呢首歌嘅蔡一智表示好多朋友聽到首歌就話要唱，當中仲有《今期流行》嘅古天樂，阿智話：「佢肯入錄音室都少有，仲要玩埋結他伴奏。嗰日佢錄到唔肯走，錄咗6、7個版本，錄音室補鐘畀咗好多錢。」蔡一傑兩位好姊妹伍詠薇同周汶錡都有份參與，傑仔指伍姑娘錄完後，拉極都唔肯走，隔幾日後又指唔係錄得太好想再錄，而周汶錡錄完之後表示要返去教囝囝唱，傑仔話：「張智霖同袁詠儀都有嚟，阿靚話為免唱得太好搶風頭，所以冇錄。」另外許志安、梁漢文同蘇永康就想等埋張衛健一齊錄，而蘇志威指老友葛民輝想錄，蘇老闆話：「大家知佢把聲，我已經耍佢唔好唱，但耍唔到。」佢哋預計首歌係揼最多錄音室租錢嘅歌。

三子合作多年，到今時今日開會仍然上晒子彈拗過面紅耳熱冇面畀，今次當然唔例外。今次再獲朱祖兒擔任藝術總監，傑仔透露舞台台面似一幅畫，所以坐山腰觀眾會睇得好清楚。朱祖兒亦專程到英國、日本搜羅靚布返嚟做歌衫，阿智話：「開會睇布嗰日佢哋兩個走先，我堅守到最後，朱祖兒拎咗塊英國買，成四、五千蚊一碼嘅布出嚟，同我皮膚膚色好襯。」傑仔即指塊布原本係留畀佢，點知蘇老闆突然叫停話完全不知有塊布嘅事，最後阿智得戚表示成功奪得塊布，更指塊布好重，做成衫應該有十幾磅，仲嘲笑傑仔冇肌肉乘得起件衫。上得紅館難免一露，傑仔指當然到適當時候會騷一騷，阿智笑指平日都有露手露面，傑仔聞言即反擊話：「露呢啲，不要臉。」

鳴謝:髮型：Jacky Ma@ Headquarters
化妝：PuiPui
場地：VERMCITY