假設你有一隻市值10萬銀名錶，有人開價14萬銀洽購，但你最後都不為所動，相信拒絕嘅原因只得兩個，一︰你大把錢唔等錢使；二︰你覺得隻錶仲有得升值！
利君（2005）喺2012年底發出通告，指主要股東君聯實業及中華藥業，獲四川科倫藥業洽購共12.28%股權，每股作價2.9167元，以通告公佈日收市價2.12元計，溢價高達四成，刺激利君翌日一度喪升近兩成。不過，經過近一年嘅拖拉後，利君喺舊年11月宣佈，買賣協議已終止。翻查資料，四川科倫藥業喺深圳上市，市值達240億銀，為利君嘅三倍。母公司科倫集團來頭不小，於1996年成立，為全球最大輸液製造商及營運商，旗下分公司達87家，前年營業收入超過300億銀。
回應本文首段提問，究竟係利君大股東大把錢，定係覺得隻股仲有得升呢？謎底噚日終於揭盅︰利君炒高7%，收報2.94元，升穿洽購價2.9167元，證明利君絕對唔止呢個價，就算有大碼頭都唔泊。主打靜脈輸液、抗生素及非抗生素成藥嘅利君，中期盈利增長53%至2.3億銀，已相當於2012年全年嘅八成，全年盈喜機會高唱入雲，保守估計下半年盈利與上半年相若，市盈率僅19倍，較同業平均約30倍折讓近四成，仲有大把上升空間！

唐牛