巴塞隆拿前鋒美斯下星期就同靚靚女友安東莉娜結婚，「MSN」另外兩位好兄弟當然會到賀啦，但尼馬見到美斯伉儷咁煙韌，會唔會黯然神傷？有巴西專欄作家周四爆料，指25歲嘅尼馬同21歲嘅明星女友布魯娜（Bruna Marquezine）經歷離合後再次分手，事件惹來巴西民眾強烈反彈！

尼馬同布魯娜喺2013年公開戀情，當時兩人分別只係20歲同17歲，可謂兩小無猜，其後尼馬由山度士轉投巴塞，兩人經歷異地戀聚少離多，加上傳出布魯娜逼婚傳聞，最終分手收場。不過，尼馬喺去年協助巴西勇奪奧運金牌後走上看台同布魯娜慶祝，兩人亦宣佈復合，網民當時瘋狂讚好，今次亦不斷質疑分手消息，尤其是兩人上周先一齊到訪南非親親大自然，尼馬10日前更喺ig張貼合照表示：「不朽的愛。（Never Ending Love.）」希望佢哋可以度過呢次情海翻波！兩位當事人暫時未作公開回應。