即將於本月26、27號喺九展舉行演唱會嘅RubberBand，今日喺觀塘錄音室綵排，歌手小肥就幫手和音，鼓手泥鯭稱綵排進展良好，仲表示望完騷後大家一齊去旅行充電，阿偉表示：「演唱會開會第一件事就係講，做完騷去邊度旅行，希望到時真係可以成班跟泥鯭去泰國學潛水。」

今次演出佢哋更加準備咗五款本地製嘅手工啤，每位成員都有一種味道，泥鯭話：「阿偉支啤酒係蜜糖味，諗起個女就甜嘅味道，我就係薑味，其餘6號同阿正分別就係斑蘭同埋啤梨味。」咁現場會唔會畀觀眾一齊飲？泥鯭話：「我唔知場地得唔得？但我喺台上就照飲，唔理大家㗎啦。」

頭場26號撞正係主音6號生日，成員們諗好點同6號慶祝未？佢哋笑言：「掟壽包呀嘛， 仲要佢自己唱「Happy Birthday to Me」，學岩布仙尼咁。」6號就話：「咁我要搵番件AC米蘭波衫，仲要搵朱慧珊同陳芷青喺我隔嚟做主持。」同時又表示新專輯將會喺演唱會同步推出，希望各位多多支持。

精選娛聞，喺晒《娛果》
http://fb.com/appledailyent