第二季心水股推介奧普(477),無驚無險升抵目標價,三成利潤袋袋平安,現價息率仲有7厘,市盈率11倍,有力再上一層樓,戰友可斬邊留邊,坐到大牛市派對完結。
今日推介未炒過嘅價質殼恒都(725)。「玩嘢咩唐牛,噚日爆升15%破晒頂,咁都叫未炒過?」稍安毋躁,回帶去番舊年7月,本欄亦曾推介恒都,當時一度高見1.75元,現價較當時僅高13%。用「僅高」一啲都唔過份,試想想,舊年7月,冇滬港通,冇千億成交,冇私募基金南下,冇大媽掃貨。而家呢?三個字︰大時代!如果1.75元係合理價,現價就肯定大低水。再講,期內恒指升逾兩成,一隻細價股竟然要跑輸大市,點計都係未炒過。