由溫流、泰民、珉豪、鐘鉉和Key組成嘅韓國男團SHINee，除咗各成員有個人活動之外，又正忙於合體舉辦第五次世界巡迴演唱會《SHINee WORLD V》，上月20號襲港喺亞博館開騷後，5子今日就巡到台灣於新北新莊體育館舉行演唱會。今次係SHINee相隔1年10個月再度訪台，6000張門票極速被搶購一空，吸金2,400萬台幣(約621萬港元)。

演唱會於今日晏晝4點舉行，雖然台灣天氣唔多好，又落雨，不過演唱會就唔受影響，SHINee比原定時間遲咗5分鐘就現身，以歌曲《Hitchhiking》揭開序幕，5子身穿色彩繽紛嘅服裝出場，一連獻唱《Married To The Music》、《Why So Serious？》、《Juliette》等大熱歌曲炒熱氣氛，粉絲立即揮動湖水綠色螢光棒。一般粉絲都會為偶像進行特別應援，不過多數都係臨完騷先進行，但台灣粉絲今次就反傳統，於開場冇耐就排字「怎麼這麼久才來？」、「每天都想看SHINee」為偶像應援，令SHINee驚喜不已。而SHINee完成演唱會後聽日就會離開台灣返韓，不過航班就唔公開。