【新增影片】

今個夏天以天價1.05億歐元由多蒙特加盟巴塞隆拿嘅法國快馬奧士文尼迪比利因為喺上個禮拜六場波拉傷大腿肌肉，嚟緊要唞成四個月。球會禮拜一已經安排咗佢飛去芬蘭準備做手術，咁貴買佢返嚟，但係得物無所用，以為巴塞教練華維迪會嬲到紮紮跳？點知佢只係新加坡賭王陳金城上身，拋低一句金句就講完。

華維迪喺回應傳媒查詢迪比利受傷嘅時候係咁講嘅：「我唔覺得大家應該諗得太多，迪比利係一個之前未試過大腿肌肉受傷嘅球員，所以好可能佢根本無咁嘅經驗去察覺自己嘅問題。佢本身係一個速度好快嘅球員，迪比利所做嘅動作對肌肉嚟講係最差嘅，或者一個更加有經驗嘅球員會知道，根本唔應該做啲咁嘅動作。」

華維迪咁樣講，係因為有西班牙傳媒影到迪比利喺開波前嘅熱身，同埋落場之前都疑似唔只一次摸住自己左邊大腿後嘅肌肉，懷疑一直都唔係太舒服，只係迪比利當時唔知道，同時巴塞嘅軍醫亦都無留意到呢個情況。