新一屆香港小姐將於明晚誕生，十位候選佳麗今日喺將軍澳電視廣播城進行泳裝綵排及試戴后冠。5號雷莊𠒇（Juliette）被抽中試戴后冠，由上屆冠軍馮盈盈負責加冕，不過就戴到有啲歪，好似就嚟跌咁，而往年被抽中試戴嘅佳麗都未能奪冠，未知今年會否打破慣例？！

見Juliette身形fit爆，自信心爆棚，佢笑言自己唔怕醜，所以着泳裝冇問題，反而覺得大會安排嘅泳衣太保守，佢笑笑口話﹕「遮咗身材？都係嘅，我就唔會揀呢啲款，會揀可以show off多啲嘅款式。」佢反而擔心自己嘅廣東話，作為佢導師嘅陳百祥就教佢講嘢慢啲，自覺現在已經有進步。

而年僅17歲嘅6號邱晴（Mandy）亦係決賽前名成功減咗十幾磅，冇咗啲baby fat，佢開心謂﹕「可能年紀細，新陳代謝比較快，有節制飲食，只食蛋白質唔食粉（麵）。」但現場現佢精神較差，佢解釋﹕「可能早起有啲攰，但有信心keep到狀態入決賽，希望到時表現淡定啲。」

另外，馮盈盈話睇好1號何依婷、8號伍樂怡同9號金美黎。馮盈盈話卸任在即，好唔捨得，希望未來可以接受更多挑戰。記者笑佢未缷任已言論大膽，佢話﹕「我講嘢不嬲唔就住，諗到乜都會分享，未來想做更多唔同工作。」