宇宙G.E.M.嘅品味....有時真係好難明，繼之前佢嘅尿片大媽Look或者焗皮褲，都為時裝界帶來災難，不過G.E.M.對自己獨特嘅品味有份打不死嘅精神，經常都挑戰界限，好似凌晨佢又嚟料。

佢半夜在fb玩直播，一現身真係睇到人打個凸，因為佢染咗頭金髮，仲好有層次咁有鮮黃漸變到橙色，又搽咗鮮綠色眼影，成身螢光花花貼紙，頭上面同條頸都有可以彎曲嘅螢光棒，加上橙色唇膏，真係隔2條街都見到佢。

著到咁做咩呢?原來佢去咗金魚街拍寫真，佢直播好Hyper咁話:「Hello，我哋o依家喺金魚街，啱啱完成拍攝寫真集，點解我成面痴晒啲嘢。」講嘢時又係咁轉去一間金魚店:「Hello，呢個係我哋頭先拍最後一個鏡頭嘅金魚店老闆，多謝你，大家手上拎住香檳，今日都幾攰，因為係好熱嘅。」經理人張丹就話「大家飲杯。」然後一齊Cheers，G.E.M.就話:「早啲瞓啦，各位BYEBYE。」

其實佢早兩個鐘已Up片上fb，話自己喺彌敦道，當時妝容打扮依然好成熟，的確好配合旺角一帶嘅打扮....其實G.E.M.身上嘅打扮可能放喺外國KatyPerry等女星身上冇乜問題，但永遠著喺佢身上，就睇到人眼凸，望望下佢隻眼影好熟口面，大家去快餐店時見到一班阿姐都好喜歡鮮綠色眼影，睇嚟G.E.M.真係好貫徹大媽style，究竟佢有冇考慮轉下stylist?