朗尼醉駕出事引來全城關注，唔知係咪因為做球星壓力特別大，佢地往往飲酒飲到失晒控。如果睇返近幾年嘅新聞，就會發現有球星都曾經犯同一樣錯，而曼城中場耶耶托尼、利物浦前鋒羅拔圖法明奴都係人辦之一。其中以耶耶托尼俾人罰得最甘，但對於享受高薪嘅佢，呢啲罰款簡直係九牛一毛，至少唔使好似賓納特咁要坐監。

耶耶托尼喺舊年11月醉駕斷正，事後被罰款5.4萬鎊（約54萬港元）、停牌18個月。耶耶事後堅稱自己係無心之失，並向公眾發出道歉信。而羅拔圖法明奴亦都喺舊年12月醉駕斷正，最終亦被判罪成，罰款2萬英鎊（約20萬港元）同埋停牌1年。法明奴事後亦發表聲明道歉。

另曾經效力曼聯嘅愛爾蘭中場吉遜，佢亦因為喺前年8月醉駕炒車俾人拉咗，最終要接受12個月嘅社會服務令、停牌20個月以及賠償6000鎊（約6萬港元）。雖然係咁，但其實呢班人已經算好，因為最尾都唔使坐監。曾經踢過利物浦、史篤城嘅英格蘭中場賓納特，就喺2011年涉及醉駕被捕，最終要坐3個月監。