O靚模始祖、29歲嘅Angelababy（楊穎）可以話係人生勝利組，2015年嫁畀大陸紅星黃曉明，去年誕下一子小海綿，但不減人氣，繼續廣告、綜藝節目密密做冇停手。

不過，人紅自然是非多，Baby經常被指耍大牌，曾被爆每次開工都要六名助手陪同。近日網上流傳一批影片截圖，指Baby喺上海拍廣告期間，要助手蹲低幫佢着鞋。圖中所見，穿上白色行政裝嘅Baby被好多人包圍住，大家都幫佢整理造型，當要換高踭鞋時，Baby一隻手扶住工作人員，另一隻手垂下，而助手就蹲低服侍佢除襪及換鞋，Baby全程冇彎低腰。

唔少網友批評Baby有「公主病」、「明明是可以能及的，非要助理伺候」、「她一年給她的助理多少錢？連襪子都要助理穿」，亦有人酸爆留言「當明星真好」！但都有網友幫Baby講好說話，指呢個情況喺拍攝時候好常見，為令效果靚啲，Model基本上唔可以坐低，因為擔心整皺件衫，髮型亦唔可以整亂，所以Baby嘅做法係可以理解。

精選娛聞，喺晒《娛果》 http://fb.com/appledailyent