人人都話要搶攻社交平台，至今最成功嘅當然係薯片喇，佢喺facebook一出post就多人畀like，對手見到真係得個嬲字。至於財經界嚟講，要數多網友粉絲嘅財經名人，康宏行政總裁（CEO）莊偉忠肯定數一數二，佢近日喺fb仲化身職場顧問，教人點樣處理辦公室欺凌，但建議大家唔好裸辭。
莊偉忠憑住「不開會CEO」呢個形象，深受打工仔愛戴，大家都覺得佢深明打工仔之苦，早前就有位網友，問莊偉忠有冇遇過辦公室欺凌，莊偉忠原先只係簡單答，諗一輪再分享自己嘅睇法。

唔鼓勵裸辭反抗

大家見到莊偉忠咁堅，都估到佢從來冇遇上辦公室欺凌喇，佢話，若然佢被人欺凌，一定用盡方法反擊，畀所有人知道，佢一啲都唔好蝦。
佢都明白，香港地，打工仔受人二分四，大部份都會選擇啞忍，息事寧人，可惜對方通常只會得寸進尺，噩夢咁先至開始。所以呢，佢認為大家如果真係遇上辦公室欺凌，都係要練大個膽，私下表達或公開講，等人人都知，然後諗定後路，大不了唔撈。
不過，佢唔係叫大家隨便劈炮喎，佢唔鼓勵人裸辭，因冇揸拿冇着落，人浮於事日子耐咗，就會埋怨自己，連自信心都無埋，最好都係騎牛搵馬，儲多個錢咁話。

李華華
mailto:[email protected]