張繼聰今晚喺銅鑼灣出席電影《今晚打喪屍》簽名會，電影推出環保袋同網上遊戲，買咗遊戲卡，就可以操控張繼聰打喪屍，佢話：「第一次參與咁重要嘅角色，今次同白只合作可以講係一還心願。知道啲人睇喪屍片都有個國際standard，我已經做夠200分，好多人都好期待，太太(謝安琪)亦好期待。」

可以操控阿聰打喪屍，如果囝囝James操控爹哋打喪屍都幾過癮，唔知阿聰會唔會畀囝囝玩呢個遊戲呢?佢笑話：「冇話畀唔畀嘅，我個仔讀國際學校，比較西方啲，油尖旺呢啲斬劈殺，就唔係咁啱佢喇。我諗等佢幾年後獸性大發嘅時候，就知爹哋好猛啦。」

自稱第一次擔重角，對票房有冇壓力?阿聰即刻玩推波：「我都係影壇新人，冇壓力，白只可能壓力大啲，佢又係金像影帝（其實係最佳男配角），載譽歸來，佢唔會令大家失望嘅，仲有萬梓良佢哋呢。」記者笑佢推波推得好快，阿聰即笑話：「我直頭係撞牆呀，票房演員好難控制，我會盡力去拉票做宣傳，對自己有信心，對票房樂觀嘅。」

嚟緊暑假，同屋企人有咩節目?佢話唔會有，因為要拍大台劇《跨世代》，今年亦會有3、4部電影上畫。佢仲話：「香港需要演員，我比較實用，就好似紅A水桶一樣，當中嘅電影戲份有啲重，有啲唔重。」問佢係咪身家大增?阿聰即拉開話題：「我講熱情，唔講片酬，好多收入都上繳家人同父母，我拍緊劇要着皮褸，天氣熱，拍到皮膚炎都生咗幾次，諗起隔離組拍古裝仲辛苦，用嚟鼓勵自己。」