股壇瀏覽器:飛達歸邊長炒長有

蘋果日報 2002/03/26 00:00


港股一如所料牛牛皮皮,走勢反覆偏軟,恒指挫26點,收10836,成交縮至50.62億元。大市毫無方向,雖然好友要托市結算期指,不過等到明日出手都重得。
飛達帽業(1100)早前宣布以先舊後新方式,配售2000萬股畀兩個基金,每股1.75元。最近傳出公司可能會收購歐洲名牌,但唔知會否以發行新股方式收購。噚日該股走勢又再轉強,升11.4%,收2.45元,成交1416萬元,股價較早前配售價上升40%,攞貨者獲利可觀。黑客話,此股幕後托價功夫不俗,估計長炒長有,不過要留意證監會否抽緊孖展。

李澤楷睇淡固網前景
政府開到聲呼籲企業裁員時要三思,但電盈(008)隨即裁員畀政府睇,認真唔畀面。不過咁,如果唔係港府過分開放電訊市場,照計電盈都唔使裁員裁得咁心急,反正電盈都冇咗專利權,基本上都唔使聽政府支笛。李澤楷喺致員工信中表明,對固網前景唔樂觀,芬佬又點可以唔拋售。電盈噚日挫2.4%,收2元,一隻冇咩前景嘅股份,重可以搵邊個長線持有呢?
亞洲聯網(679)噚日勁升44.9%,成交增至1025萬元,公司又唔出聲明講咩事。據Cookie話,此股曾經洽商賣殼,唔知今次係咪堅料。不過幕後買得好勁,估計有動作跟尾。
第一龍浩(875)果然有料到,股價噚日急升19.3%,收0.13元。i師傅話可能要向0.15元進發。