近排天氣的確陰晴不定，元朗大坑渠隔籬嘅鐘聲徑其中一棵樹，最近幾日居然有人掛起晴天娃娃，全部都掛上標語，其中最大一個有半個人咁大，上面仲寫着「請救救我吧」，而其餘的標語仲包括「替你遮蔭不要斬我」、「幫你降溫不要斬我」，到底目的為何？

《蘋果》日前到現場視察，發現沿途綠葉成蔭嘅鐘聲徑，只有真光小學對開嘅一棵約5米高嘅串錢柳，被人掛上近25個以綠色毛巾製成、大小不一嘅晴天娃娃，再望真啲終於係其中兩句標語發現端倪：「我祈求奇蹟出現留住通風廊」、「祈求十七億能活化舊區」，原來事件同近日爭議聲不絕，連接朗屏站至教育路、造價17億嘅行人天橋有關，事關工程或要斬樹修橋。

住喺鐘聲徑附近約20年嘅Leo話，星期四夜晚返屋企時見到有7、8個人自發喺樹上掛上晴天娃娃，但當時無留意佢哋身份。Leo形容棵樹對元朗居民「幾重要」，因為係平時居民嘅聚腳地，所以希望大樹得以保留。佢表示，無論基於甚麼原因都唔一定要斬佢，事關重新種一棵相若大小嘅樹相當費時。

至於平時喺大樹下乘涼嘅街坊區婆婆指，斬唔斬樹都「無所謂」，自己唔覺得可惜，因為棵樹屬於政府，自己無得話事：「政府嘅嘢無得擔心，政府做嘢到我反對咩？」對於將來或會落成嘅17億天橋，區婆婆保持一貫態度，指「行得到咪好，行唔到你起10條都無用㗎！」

搬入元朗居住約6年嘅羅先生則覺得市中心的確太多行人，所以的確有需要興建天橋疏通人流，不過佢認為棵樹有保育及美化環境嘅作用，斬咗去相當可惜。因此佢希望修改天橋工程，避免要斬樹。

你敢爆，我敢獎！ 即Call《蘋果》24小時爆相爆片熱線 ：63836568