發哥周潤發主演嘅電影《無雙》，近日大隊上咗去北京宣傳。向來早起行山做運動嘅發哥，上到北京都不忘繼續做運動，加上北京近排天氣，踏入秋天十分清爽，發哥仲帶隊去朝陽公園跑步。

有網民連續三日喺公園見到發哥，消息傳開去引來唔少跑友去公園碰吓運氣見偶像。其中有網民留言話︰「發哥朝陽公園連續三天晨跑打卡！聽說又有許多跑友為了偶遇發哥去了朝陽公園，還有人不相信發哥能連跑三天，結果真的就又遇見了，幸運偶遇發哥的跑友們，各種自拍合影晒起來。」

至於電影《無雙》嘅官方微博今早都有貼相，相中成班電影團隊，包括出品人于冬、導演莊文強等，當然唔少得發哥嘅指定動作，自拍啦！仲留言︰「大家上午好，今天也是用發哥跑步style開啟的一天，我們的電影《無雙》跑團再度擴充了！」

精選娛聞，喺晒《娛果》
http://fb.com/appledailyent