當晚秋官打扮得西裝骨骨,同《非》劇一班演員包括唐寧、韓瑪莉、陳國邦齊集中環行人電梯附近對稿,而向海嵐因為喺呢場戲冇對白,所以行埋一邊玩手機SMS,之後又行咗去便利店買香口膠。現場見佢個樣木口木臉,似乎心情麻麻。
對完稿,秋官就同向海嵐坐上部掛咗個「T」牌(即臨時車牌)嘅古董開篷跑車,拍攝遊車河場面。唔知秋官係咪唔熟習揸棍波,所以試車嗰陣成架車突然溜後,車尾差啲撼埋電燈柱,嚇到向海嵐成個呆晒。
到正式拍攝嗰陣,秋官已經掌握到點揸棍波,結果一take過搞掂。事後秋官解釋話佢好少揸棍波,亦揸唔慣跑車,事關佢係穩陣派,鍾意揸舒適啲嘅房車喎!