跑了兩個賽馬日，大部份騎師都熱夠身，但對祈普敦嚟講，周日(9日)先係佢今季嘅開鑼日，上季尾因不小心策騎，祈普敦選擇唔罰錢，而決定今季首兩戰停賽，結果今期復出變咗「半隱形人」，只得最後兩場有馬騎，座騎同樣嚟至仍未開齋嘅麥菲文馬房。

小祈上季高開低走，頭兩個月贏出超過10場頭馬，但之後表現大跌watt，變成「月行一善」，每個月只得一、兩場頭馬進賬，全季只得18場頭馬，今季亦只得頭半季牌照，小祈亦都明白自己處境麻麻，佢話今季繼續向蘇保羅、澳洲鄉里大摩、蔡約翰同麥菲文爭取座騎之餘，亦有向呂健威、沈集成同文家良等本地練馬師自薦，不過依照今期座騎數目嚟講，似乎一眾練馬師仍然抱觀望態度。

小祈喺暑假同女友Morgan拉埋天窗，希望婚後帶旺運勢，今期佢兩匹座騎都出自「加州」系，包括「加州神箭」、「加州更好」，其中頭馬希望落在第9場三班1200米泥地賽之「加州神箭」。

「加州神箭」上季6月喺同班同程入Q後，一心諗住喺煞科前交代，但7月8日之戰入閘後因發脾氣踢傷腳部而退出，好彩只係小問題，今場準戰工序完整，小祈話最令佢留下印象係上月31號泥地大閘，全程落雨，但隻馬唔怕泥頭，喺外疊越走越勁大勝3.75個馬位贏出，「加州神箭」衝過終點後仍然維持勁勢，推算此駒都有一定能力。

今場「加州神箭」排11檔，但泥地跑外檔唔一定係壞事，可唔可以出閘後盡快楔入內疊，就係真小祈造化啦，如果跑入前列，相信騎者今季條路都會較易行！