連詩雅啱啱憑電影《喜愛夜蒲》喺今屆香港電影金像獎獲最佳新人獎提名，雖然佢最後輸咗畀都係歌手嘅台灣代表蕭敬騰，不過連詩雅喺《喜愛夜蒲》裏面嘅出色表現，令導演錢國偉對佢好有印象，所以就搵番佢拍《喜愛夜蒲2》。

腳傷未癒

前晚《喜2》劇組就去到中環擺花街取景，同場除咗連詩雅同關楚耀兩位演員之外，導演錢國偉亦在場。之前喺台灣長跑整傷咗膝頭嘅連詩雅，當晚就負責揸住架保時捷（波子）跑車剷上行人路，截停行過嘅關楚耀。可能連詩雅腳傷未好番，同埋揸車衝上行人路都有一定危險性，所以導演就安排咗一個男工作人員戴假髮拍呢個鏡頭，到拍近鏡時先至搵連詩雅出鏡。
連詩雅喺空檔時就好乖咁坐埋一邊聽歌，而關楚耀因為一直有佢嘅戲，所以就冇得停。因為前晚係星期六嘅關係，中環蘭桂坊一帶特別多人，所以劇組拍咗冇幾耐，就已經有幾十人圍觀，錢國偉拍咗差不多一個鐘，見越來越多人，之後拍多兩個吉鏡就拉隊收工，果然快靚正。