【扮變性人】《翠絲》入圍東京電影節 姜皓文帶老婆出席:佢喺度我個心定啲
姜皓文翠絲東京電影節李駿碩
將於11月上映嘅新戲《翠絲》,是第一部直接以跨性別為題嘅港產片,電影未上已打響頭炮,獲邀成為第31屆東京國際電影節亞洲未來單元競賽電影,姜皓文(黑仔)破格演繹變性人「翠絲」,對於電影有份入圍競賽,黑仔坦言心情複雜:「因為拍攝時真係用咗好多心機落去,亦都有影響過自己情緒,依家入到一個國際性嘅電影節,真係好開心。」
問到是否對上映打了一支強心針?黑仔表示:「台前幕後拍攝時交出最好嘅自己,其實已經有交代,希望觀眾會喜歡,呢部係我從影生涯其中一部最重要嘅作品,拍攝其間我好大壓力,迫到自己好緊,太太一如以往地咁支持我,所以我會同佢一齊出席電影節,佢喺度我個心都定啲。」
電影由「鮮浪潮大獎」李駿碩執導,對於首部作品已入圍東京電影節,李駿碩表示好開心,希望快啲帶電影同當地觀眾見面;而《翠絲》嘅預告片在網上曝光,有份演出嘅黑仔、惠英紅、吳肇軒等穿插其中,首尾鏡頭以黑仔嘅「男」、「女」造型互相呼應,第一個鏡頭是黑仔對着塊鏡,用毛巾拭去剃鬚膏,最後一個鏡頭係着住花睡衣、戴髮網嘅「女」look,表達出角色嘅內心世界,其實是個錯誤地長着男性身軀嘅女人!
精選娛聞,喺晒《娛果》
http://fb.com/appledailyent