【一提屋企…】老竇頻頻分身家 劉鳴煒講父幹:係有少少幫助
大劉甘比劉鳴煒分身家
大劉劉鑾雄喺今年月初,以「健康極不穩」為由,將其心血華人置業(0127)嘅股份分畀長子劉鳴煒同太太陳凱韻(甘比)所生嘅一對子女(新聞連結: http://bit.ly/2lBURhj ),其中劉鳴煒獲分配24.97%股份,市值56.6億元。
大劉較早前接受《蘋果》訪問時,提到分大份畀劉鳴煒嘅原因係「我好錫佢」(新聞連結: http://bit.ly/2mwC2jz ),而華置日前再公佈將去年5月以69.26億高價,向恒大收購的盛京銀行(2066)5.77億股H股,全數轉讓予甘比全資持有之公司,甘比每年收息可能至少2億元。(新聞連結: http://bit.ly/2njOJOZ )
劉鳴煒今日以青年事務委員會主席身份出席出席雜藝大賽時,被問到爸爸大劉連日嚟「分身家」,佢一聽到即刻封嘴「我今日唔講屋企嘢喇,你哋仲有有嘢問?」
唔講屋企嘢,咁問佢覺唔覺得年輕人唔好要靠父幹?劉鳴煒話:「一個人唔努力的話,家境幾好都可以失敗,最緊要做好自己,家境係有少少幫助,但係唔擔保你會成功。」
提到劉鳴煒學木鼓嗰件事,佢話自己學咗6星期,仲有兩個禮拜就要表演,但係仲未識打,佢話自己已經打到手都瘀晒。劉鳴煒話上年試過學跳舞,但自己天份有限,所以諗住學樂器啦,以為打鼓容易啲,點知係更加難,不過自己都有興趣繼續學,但自己對拍子就唔係太敏感,仲話好彩唔使唱歌,「如果要唱就真係趕客喇!」
劉鳴煒話為咗個木鼓表演,心情好緊張,盡量抽時間去練,不過練嗰陣都有啲麻煩,「喺屋企練又怕鄰居投訴,喺公司朝九晚五又唔係咁方便。(覺唔覺得香港都冇乜場地俾人去學呢啲?)甚實都有嘅,不過真係要搵囉,都覺得供不應求。」
咁既然學樂器咁有得着,唔知劉鳴煒又會唔會鼓勵自己啲小朋友學吓樂器咁呢?劉鳴煒都係嗰句:「今日唔講屋企嘢。」
《蘋果》第十二屆金話梅電影選舉(Golden Plum)又嚟喇!由今日起,請在以下網址( http://campaign.appledaily.com/goldenplum2017 )投票,選出心目中的爛片之霸,截止日期係4月6日,賽果將於香港電影金像獎舉行前夕(4月8日)揭曉。