由韓劇《我係金三珣》女星金宣兒夥拍甘宇成主演嘅SBS新劇《能先接吻嗎》，現時喺韓國熱播，港劇迷亦可於Viu同步追看。劇集噚晚播出第13、14集，承接上集劇情，金宣兒偷偷跟住甘宇成搭同一架巴士，並一同聽音樂。

而金宣兒唔小心挨咗喺甘宇成嘅膊頭上瞓着咗，不過甘宇成就唔想嘈醒對方，最後兩人坐到巴士終點站，甚至被困喺車廂內，之後甘宇成更向金宣兒表白：「我打算好好地去愛你，我好想每一日每一刻都愛你。」鏡頭一轉講到甘宇成接到寵物醫院嘅電話，表示其愛犬星兒突然無法呼吸，癌細胞已經擴散到全身，之後甘宇成就接星兒返屋企，回想起同星兒嘅點滴，陪伴愛犬最後一程，場面傷感。

金宣兒劇中嘅前夫吳智昊去咗搵金宣兒，勸佢唔好周旋於甘宇成及甘宇成女兒鄭多彬中間；至於金宣兒嘅妹妹及媽媽得知金宣兒有新男朋友，就一直追問甘宇成嘅事，甚至暗中調查甘宇成嘅身份。而甘宇成嘅前妻亦返咗韓國，女兒鄭多彬就聯同媽媽一齊上甘宇成屋企，卻發現金宣兒喺甘宇成屋企住嘅蛛絲馬跡，鄭多彬就趁住父母傾偈時，到屋企樓下截停金宣兒，叫佢離甘宇成遠啲。

噚晚MBC電視台有新劇《偉大的誘惑者》首播第1、2集，以3.6%、3.4%收視率出發，成功排收視第二，而《能先接吻嗎》噚晚兩集收視分別係8.5%及10.4%，繼續做同時段嘅收視冠軍，至於KBS嘅《Radio Romance》就跌至開播新低，得2.9%收視率，包尾墊底。

更多韓流，喺晒《娛果》
http://fb.com/appledailyent