【誤信KOL有紅葉】C君富士山下影婚紗相 同未婚妻情深對望被考起
蘋果日報 2019/12/05 17:48
C君黃天頤鄭詩君
組合農夫鄭詩君（C君）將會於下星期五（13日）與拍拖5年的港台DJ黃天頤結婚，一對新人於11月中去了日本富士山河口湖影婚紗相，當中更打破傳統，新娘子就冇着白色婚紗，只穿起黑色服飾，二人在富士山下相擁，亦有黃天頤摸住C君面珠，除了戶外場景，二人更有在studio玩貓影相。
一般新人影結婚相大都半年前去影，C君就因為誤信KOL，在婚前三星期才成行，他表示：「我之前上網睇啲KOL啲相，見到影紅葉好鬼靚，於是一心想影輯滿佈紅葉嘅婚紗照囉，可惜事與願違。十月尾去搵婚攝公司時，職員話十月尾冇紅葉要到十一月中先開始有啲，咪搞到成件事咁遲囉。」一對新人去到富士山取景，不過就發覺現場紅葉不多，幸好天朗氣清、有冠雪的富士山作背景。提到婚紗相沒有穿傳統婚紛，準新娘天頤表示：「我一直覺得婚紗係結婚當日先著，pre-wedding可以揀自己鍾意嘅衫。同埋C君成日強調輯相主題得兩個字，就係開心，如果着婚紗影相好難開心、又窄又盛又顧住有無走光又要縮肚。」
二人用了半天就完成拍攝，C君更笑言call time比起同Do姐拍的旅遊節目還早，當日要凌晨4點起身，6點就要完成化妝出發，而拍攝過程最大挑戰要情深對望，C君自言考起大家：「因為要喺第三者面前做親密舉動，真係尷尬到不得了，加上一望就忍唔到笑。從來冇自己畀錢影相，只有收錢影相，畀錢影相仲要受人命令。」最後，C君表示籌備婚禮順利，二人未有出現意見分歧，更大讚外母十分開通，主動提出簡化過大禮的繁文縟節，不過就當然希望早日抱孫。
此外，黃天頤就在IG留言對婚禮不太緊張，她說：「呢兩日好多人問我緊唔緊張，其實真係唔緊張，反而好期待到當日，因為⋯⋯我覺得已經俾人恭喜咗好耐，自己都有啲唔好意思。籌備嘅事都一樣唔緊張，雖然堆埋咗好多嘢要處理，但我哋嘅信念係：總會搞得成！」
二人在富士山下影婚紗相。
當日天朗氣清，更影到冠雪的富士山。
C君如願看到紅葉，由未婚妻摸他面珠的甫士相當搞笑。
C君誤信KOL，三星期前才去日本影婚紗相。
一對新人除了外景，亦有在Studio與貓影相。