廣深港高鐵（香港段）得嗰短短26公里，但係就最少有17宗風水申索，幾乎每1.5公里就有一單，條鐵路睇嚟煞氣幾重。工程最近喺新界陸續開展，聽聞港鐵未動土先破財，喺一啲村落度又搭巨型花牌又砌燒豬，仲請食盆菜，祈求開工大吉。據講有關方面喺其中一條村擺咗十圍八圍盆菜宴，閒閒哋要用幾皮嘢，啲錢咁使法，唔怪得起高鐵要用成669億！

村長：唔清楚幾多錢

八方早排路過石崗七星崗村，見到村口搭咗個足有兩、三層樓高嘅巨型花牌，上面寫住「高鐵廣深港高速鐵路七星崗段工程興工大吉」、「前田一中國建築聯營敬賀」，旁邊又掛滿彩旗寫上「村務興隆」嘅彩旗。有新界人透露，早排港鐵同承辦商聯絡村民，叫佢哋砌燒豬、搞盆菜宴，錢會由佢哋支付。
好似七星崗村咁，就係咁易擺咗十圍八圍盆菜宴，據講佢哋仲有問埋隔籬嘅菜園村民去唔去食。不過菜園村因為起高鐵而被鏟平，啲村民又點會走去食呢餐高鐵盆菜呢？據講咁樣飲飲食食，花費最少幾萬蚊。八方問過七星崗村村長鄧觀祐，佢話呢類儀式豐儉由人，自己都唔係好清楚用咗幾多錢，因為港鐵係同村內其他代表聯絡喎。咁究竟高鐵盆菜錢從何來？係咪喺669億工程費度拎錢出嚟飲飲食食？從港鐵發言人嘅書面回覆中，可以話搵唔到答案。佢哋話但凡喺香港進行嘅工程項目，工人同承判商通常會喺開工前舉行拜神儀式，以祈求工程順利。開支係由「各方」攤分。

港鐵：條數唔係咁計

咁「各方」即係邊幾方呢？係政府？港鐵？定係股東？佢哋又唔肯講喎。咁佢哋拜神究竟拜咗幾多錢？港鐵又話冇實數，只肯講啲錢主要用喺買燒豬、祭品等方面。至於呢筆開支係咪669億工程費一部份呢？港鐵發言人又話「條數唔係咁計」，但又冇斷然否認囉。
mailto:[email protected]