一田百貨前行政總裁（CEO）莊偉忠退休3個月就復出，噚日首日到康宏金融（1019）返工擔任CEO。佢好坦白咁同華華講「（退休）3個月好似成世咁耐」，證明佢都係唔工作會身痕嘅人。
莊偉忠話好享受退休生活，每日10點鐘起身，瞓到自然醒，然後去做freelance，最重要係，「我識太太31年，只得呢幾個月可以日日一齊食早餐」，乘機又晒恩愛。不過，佢阿媽就唔多like，話佢只得54歲，好後生，咁早退休唔返工，似乎唔係好啱。

加盟康宏做CEO

佢5月初正式離開一田之後，亦都收到好多人邀請加盟，上市公司或私人公司都有，直至遇上康宏主席王利民，發覺大家好啱傾，於是一拍即合，「我只係見過王利民兩面，第一次係康宏邀請我演講，第二次係一齊食飯」，佢考慮咗冇幾耐就應承加盟康宏做CEO。
𠵱家多數人只記得莊偉忠做過一田，查實佢一早有金融市場經驗，係安信信貸創辦人之一，之後又去過馬會，佢喺一田夠高調先至廣為人認識。不過佢好謙咁話，「多年冇接觸金融，呢份新工作對我都係挑戰」，但隨即又話，「去到尾，都係講管理」。
佢亦好識做，向王利民送高帽，讚對方有風格，兩人對政治與管理嘅理念相近，佢希望可以擦出火花並且帶來新事物。

李華華
mailto:[email protected]