韓國7人男團MADTOWN於2014年出道，去年因事務所問題團隊宣佈解散，當中成員都各自發展，有部份成員分別喺歌手及演戲方面發展，而22歲嘅H.O(宋在淏)除專注學業外，亦於網上平台Afreecatv當BJ主播。

近日H.O就喺直播節目中大呻做偶像只係表面風光，直言係一件非常難嘅工作。H.O由選秀當練習生開始就孭住一身債，佢話呢啲債務來自訓練、錄專輯、拍MV時租借場地、服飾、攝影師，甚至餐飲費都會計算，佢話：「如果要開粉絲見面會嘅話，咁樣個費用只會更加驚人。」

H.O自爆MADTOWN出道初期就已欠債高達5億韓圜(約368萬港元)，雖然佢哋有7個人攤分債務，但每人都要負債52.5萬港元，而佢哋出席一個活動係唔會有咁嘅收入，所以令佢哋負債會越來越多。

同時佢又踢爆團隊上音樂節目只係為咗曝光，提升知名度，喺節目上係唔會賺到錢，要賺錢就要靠開演唱會、出席品牌活動、海外表演、商演等，但如果團隊冇人氣及知名度嘅話，咁樣要保證收入就更加百上加斤，佢慨嘆話：「專輯要賣到十萬張已經係超級困難，即使一萬張都好難，因為現在仲有邊個會買專輯呢？而且即使賣得，又要同公司分賬，想還債仍然十分難。」H.O仲假設如果同公司平均分賬，假設賬1億韓圜(約74萬港元)，公司就分咗一半約37萬港元，但當中37萬港元要同7個人分，而佢最後只分得5萬多元，但呢5萬多元佢都唔使旨意落袋，因為全數都會用來還公司訓練佢哋嘅債務，情況十分淒涼。

現時轉做BJ主播嘅H.O似乎冇做偶像嘅包袱，所以佢都唔介意繼續爆做偶像嘅慘況，佢強調佢所講嘅係佢自己嘅經歷，唔代表所有組合都有咁嘅情況，但佢令外界明白要做偶像唔係一件易事，亦唔好未經考慮就發明星夢想做偶像，佢話做偶像幾乎冇時間瞓覺，身體同精神上都好痛苦，仲要承受網民喺網上嘅批評，真係有苦自己先知。

更多韓流，喺晒《娛果》
http://fb.com/appledailyent