前日有4萬人冒雨參加「民間反對國民教育科大聯盟」喺政府總部搞嘅「公民教育開學禮」，除咗老師、家長同小朋友外，八方發覺現場仲有唔少熱血「巴打」撐場。有理由相信，現場有部份反洗腦「生力軍」，係受到一個甜網嘅號召，喺呢一日放低部電腦、「着番條褲」出嚟反洗腦。
老友個老友嘅老友同八方講，坊間一個好受巴打歡迎嘅甜網ThisAV，前日無啦啦「暫停開放」一日，仲喺網站上載咗一幅學民思潮三子凱撒、黃莉莉、林朗彥喺政總外絕食嘅相。
網站「熄燈」，但係張貼咗一封聲明，語重心長咁勸各位巴打，叫佢哋「着番條褲」，諗吓呢幾個學生喺政總嘅行動背後有乜理想同目的、又為大家同下一代做咗乜。

讚學民和平理性爭取

聲明接住話，其實佢哋都愛國、愛黨、愛香港；所以尊重《基本法》提出嘅一國兩制同港人治港理念，希望政府可以聆聽九萬人同學民思潮小朋友嘅訴求，仲大讚學民已經用咗最和平理性方式爭取擱置國民教育課程。
巴打話，呢個AV網好關心社會時事，網民不時讚佢係「良心企業」。好似兩年前馬尼拉人質事件，呢個網都有出post，呼籲網民捐錢協助死傷者家屬。想當年，八九民運，成人雜誌《龍虎豹》都以「國家興亡．人人有責」為題，登廣告宣佈義賣，可見黃色雜誌、AV網嘅讀者、觀眾當中，確係有唔少「熱血人士」。

mailto:[email protected]