紐卡素剛啱公布咗喺球會一億英鎊營業額中,錄得近二千八百萬鎊(約三億六千萬港元)盈利。球會亦應承喺一月轉會市場重開時,撥一千萬鎊(約一億二千八百萬港元)畀領隊卜比笠臣擴軍買球員!
聽講卜比Sir仍然好欣賞巴塞隆拿前鋒古華特,真係有可能喺一月簽佢番嚟。不過我求大俠反而擔心卜比笠臣遲早激到爆血管!事關紐卡素𠵱家都成大半隊係「曳仔」一族,淨係目前單強姦案,都搞到球隊上下風聲鶴唳。一陣又傳呢個,一陣又傳嗰個,如果再加埋有唔少犯事前科、包括早年曾經同樣牽涉強姦案嘅古華特,你話卜比Sir到時顧得教波定顧得教仔呢?
薛基傷愈冇荷杜熱刺行運
熱刺主將薛基終於傷愈,好有機會喺下個禮拜聯賽作客李斯特城復出,延續熱刺近期佳績。呢個消息同時亦對前領隊荷杜幾諷刺,因為佢被炒之後,羅比堅尼、普耶及薛基呢幾位主力先至陸續復出,戰績亦得以改善。相信荷杜見到熱刺愈打愈好,只有歎句「時不我與」囉!
名家效應盃仔賽跟風者眾
我求大俠發覺西班牙波都幾常見開出淨贏一球嘅波膽,好似呢兩晚西班牙盃,就算甲組隊對住啲低組別嘅亦一樣!而其中一場泰拿沙對利雲特,唔知係咪本報名家波王貼咗利隊W嘅關係,結果利隊由受讓平?半,畀人煲到臨場試過要讓番轉頭。最後當然贏埋啦,你冇跟到就蝕底囉!