日本國民老婆新垣結衣將與松田龍平合作NTV電視台10月首播新劇《無法成為野獸的我們》，劇集由《逃跑雖可恥但有用》編劇野木亞紀子炮製，講結衣BB飾演嘅30歲主角深海晶，與松田龍平扮演嘅根元同樣係努力扮作待人接物，以及工作上都表現完美，內心卻有不為人知嘅一面。

劇集今日再公佈田中圭、菊地凛子同黑木華等新陣容加盟，田中圭會扮演結衣BB男友，已進軍荷李活嘅菊地凛子相隔多年再拍日劇，會扮演松田龍平女友，今次亦係自電影《戀愛部屋》後，佢相隔11年再同結衣與松田龍平合作，黑木華會飾演給予結衣BB壓力嘅神秘女子。田中圭憑《大叔的愛》上位後劇接劇，可惜上季嘅《健康而有文化的最低限度生活》收視不濟，今次喺劇集夥結衣BB演情侶，令劇集更令人期待。

精選娛聞，喺晒《娛果》
http://fb.com/appledailyent