「宅男女神」陳瀅舊年公開同賭王四太猷亨拍拖，二人相戀半年多，起初熱戀甜蜜蜜，不過最近有指26歲嘅陳瀅，主動向23歲猷亨逼婚，嚇驚驚咗猷亨，加上猷亨忙於打理家族生意，經常澳門同香港周圍飛，據知二人確實進入冷靜期，而陳瀅亦努力箍煲中。不過佢日前就透過經理人話自己只係低調處理感情，大家都係成年人有共識專注工作。(新聞連結： http://bit.ly/29MjSld )

今個月9號，陳瀅就獨自飛去加拿大探外婆，同行嘅唔見猷亨，反而猷亨喺第二日，就俾本報影到陪媽咪四太食飯。似乎陳瀅箍煲行動仍需努力中。

同猷亨戀事危危哋嘅陳瀅，今日喺Igpo咗自己張沙灘泳衣相，另外仲有張佢同兩個女仔一齊嘅合照。

第一張相，爬喺沙度嘅陳瀅，上身正面幾乎完全被沙遮掩，第二張又因為太遠加上背光，同樣冇嘢睇，不過見陳瀅啲笑容，似乎喺呢一刻，暫時拋開咗感情煩惱，盡情同陽光玩遊戲！